फेसबुकही "नेट न्यूट्रॅलिटी'च्या बाजूने

फेसबुकही "नेट न्यूट्रॅलिटी'च्या बाजूने Tags: net neutrality, California, Mark Zukerberg, USA, California न्यूयॉर्क - इंटरनेट वापराचे स्वातंत्र्य अबाधित राखण्यावरून सध्या जोरदार चर्चा रंगली असताना आज फेसबुकचे संस्थापक मार्क झुकेरबर्ग यांनी आपण "नेट न्यूट्रॅलिटी‘च्या बाजूने असल्याचे स्पष्ट केले. फेसबुकचा "इंटरनेट डॉट ऑर्ग‘ हा कार्यक्रम "नेट न्यूट्रॅलिटी‘च्या विरोधात असल्याचा आरोप झुकेरबर्ग यांनी फेटाळून लावला. फेसबुकच्या "इंटरनेट डॉट ऑर्ग‘ कार्यक्रमासाठी भारतात रिलायन्स कम्युनिकेशन ही कंपनी भागीदार आहे. फेसबुकच्या या कार्यक्रमामुळे "नेट न्यूट्रॅलिटी‘ला धक्का पोचत असल्याचा अनेकांचा आक्षेप आहे.  "इंटरनेट डॉट ऑर्ग‘ हा फेसबुकने सुरू केलेला महत्त्वाचा कार्यक्रम असून, त्याद्वारे जगभरातील 5 अब्ज नागरिकांना इंटरनेटशी जोडण्याचे उद्दिष्ट ठेवण्यात आले आहे. त्यासाठी सॅमसंग आणि क्वॅलकॉम या बलाढ्य कंपन्यांशी फेसबुकने भागीदार केली आहे. भारतात रिलायन्स कम्युनिकेशनच्या भागीदारीत सुरू करण्यात आलेल्या "इंटरनेट डॉट ऑर्ग‘ कार्यक्रमाच्या माध्यमातून 33 संकेतस्थळे मोफत उपलब्ध करून देण्यात येणार आहेत. मात्र, हा कार्यक्रम "नेट न्यूट्रॅलिटी‘च्या संकल्पनेला धोका निर्माण करणारा असल्याचा मोफत इंटरनेट मोहिमेतील कार्यकर्त्यांचा आरोप आहे.  अलीकडे फेसबुकच्या वतीने थेट मार्क झुकेरबर्गला प्रश्‍न विचारण्याची संधी उपलब्ध करून देण्यात येते. मंगळवारी रात्री एका पोस्टद्वारे मार्कने फेसबुकच्या युजर्सना कुठल्याही विषयावर प्रश्‍न विचारण्याचे खुले आवाहन केले होते. त्यास युजर्सकडून मोठ्या प्रमाणात प्रतिसाद मिळाला. जॉश कॉन्स्टीन यांनी इंटरनेट डॉट ऑर्ग आणि "नेट न्यूट्रॅलिटी‘बाबत प्रश्‍न विचारला होता. त्याला उत्तर देताना मार्कने "नेट न्यूट्रॅलिटी‘चे समर्थन केले. तसेच इंटरनेट सेवा पुरवठादारांनी भेदभाव करू नये आणि कुठल्याही मर्यादा ठरवू नयेत, असेही स्पष्ट केले. या वेळी मार्कला विविध प्रश्‍न विचारण्यात आले. फेसबुकवर लवकरच टोमणा मारण्याचे बटण उपलब्ध होणार असल्याचेही मार्कने एका उत्तरात स्पष्ट केले.