"नेट न्युट्रॅलिटी' - कुठे, कशी?

"नेट न्युट्रॅलिटी' - कुठे, कशी? "नेट न्युट्रॅलिटी‘ म्हणजे काय?  इंटरनेटवरील प्रत्येक बाइट हा सारखा असतो, मग तो तुम्ही यू ट्यूबसाठी वापरा, नाहीतर एखादे वर्तमानपत्र वाचण्यासाठी किंवा इंटरनेटवर सिनेमा पाहण्यासाठी वापरा, नाहीतर विकिपिडियावरील काही माहिती डाउनलोड करण्यासाठी वापरा. विजेचा प्रवाह घेतला आणि त्याचा वापर खोली प्रकाशमान करण्यासाठी वापरता की एखादे होम अप्लायन्स किंवा विद्युत उपकरण चालवण्यासाठी वापरता, याच्याशी वीज कंपनीला काही देणेघेणे नसते. त्याला दर सारखाच असतो. अगदी त्याच प्रकारे इंटरनेटच्या वापराला नियम पाहिजे, यालाच "नेट न्युट्रॅलिटी‘ म्हणतात. "नेट न्युट्रॅलिटी‘वर भारताआधी काही देशांनी कायदे संमत केले आहेत, तेथील स्थिती अशी ः  चिली  "नेट न्युट्रॅलिटी‘ नियमन सुरू केले ः 2010 (असे नियमन करणारा जगातला पहिला देश) त्यांचा कायदा काय सांगतो? ः फेसबुक, ट्विटर, विकिपिडिया यांनी सर्व्हिस ऑपरेटरशी त्यांच्या सेवा मोफत असल्याबाबत कोणताही व्यवहार करू नये; अन्यथा त्याने "नेट न्युट्रॅलिटी‘ कायद्याचा भंग होऊ शकतो. मेक्‍सिको  "नेट न्युट्रॅलिटी‘ नियमन सुरू केले ः 2011 त्यांचा कायदा काय सांगतो? ः "नेट न्युट्रॅलिटी‘बाबत मेक्‍सिकोचा कायदा जगात सर्वांत कडक आहे, डाटा एक्‍सचेंजमध्ये कोणत्याही स्वरूपाचा भेदाभेद करू नये, पारदर्शकता राखावी आणि यूजर्सची प्रायव्हसी राखावी, असे त्यांचा कायदा सांगतो. अमेरिका  "नेट न्युट्रॅलिटी‘ नियमन सुरू केले ः 2015  त्यांचा कायदा काय सांगतो? ः ब्रॉडबॅंड हे सार्वजनिक उपयुक्ततेचे साधन आहे. त्यामुळे त्यावरील माहिती रोखता येणार नाही किंवा सर्व्हिस ऑपरेटरला त्या माहितीकरिता रक्कम आकारता येणार नाही. याच कारणास्तव कंपन्यांची "फास्ट लेन्स‘ आणि "स्लो लेन्स‘ अशी वर्गवारी करता येणार नाही. नेदरलॅंड "नेट न्युट्रॅलिटी‘ नियमन सुरू केले ः 2011  त्यांचा कायदा काय सांगतो? ः इंटरनेटवरील सेवा किंवा ऍप्स यांचा उपलब्धतेची (ऍक्‍सेसची) गती सर्व्हिस ऑपरेटरला कमी करण्याचा अधिकार नाही. "नेट न्युट्रॅलिटी‘बाबत कायदा करणारा युरोपीय महासंघातील नेदरलॅंड हा पहिला देश ठरला आहे. ब्राझील "नेट न्युट्रॅलिटी‘ नियमन सुरू केले ः 2014  त्यांचा कायदा काय सांगतो? ः कोणतेही डाटा पॅकेज, कंटेन्ट, त्याचा उगम, अंतिम ठिकाण, सेवा, टर्मिनल, ऍप्लिकेशन्स यांचा विचार न करता सर्व्हिस ऑपरेटरने कम्युनिकेशनचा आदर केला पाहिजे. व्हिडिओ कॉन्फरन्सिंग, व्हिडिओ स्ट्रिमिंग यांसारख्या बॅंडविड्‌थ इंटेन्सिव्ह सेवांना सर्व्हिस ऑपरेटर जादा शुल्क आकारू शकत नाही. इक्वेडोर "नेट न्युट्रॅलिटी‘ नियमन सुरू केले ः 2014  त्यांचा कायदा काय सांगतो? ः कोणताही सर्व्हिस ऑपरेटर आपल्या ग्राहकाला किंवा वापरकर्त्याला इंटरनेटवरील कोणताही डाटा मिळवणे, त्याचा वापर करणे, पाठवणे, त्याचे वितरण करणे, त्यात सुधारणा करणे यापासून रोखू शकत नाही किंवा त्याच्या उपलब्धतेत आडकाठी आणू शकत नाही किंवा त्याच्या सेवेची गती मंदावू शकत नाही. हा नियम सर्व इंटरनेट वापरकर्त्यांसह कोणत्याही माहिती तंत्रज्ञानाच्या आणि दळणवळणाच्या सेवेला लागू होतो. (सकाळ संशोधन आणि विकास विभाग)